Үйлчилгээний нөхцөл

Энэхүү үйлчилгээний нөхцөл нь WinU платформоор дамжуулан бүтээгдэхүүн, үйлчилгээ худалдан авах, борлуулах, төлбөр тооцоо хийх, хүргэлт зохион байгуулах, урамшуулалд хамрагдах болон платформын бусад үйлчилгээг ашиглахтай холбоотой харилцааг зохицуулна.
Хэрэглэгч болон харилцагч байгууллага нь WinU платформд бүртгүүлж, үйлчилгээ ашиглаж эхэлснээр энэхүү үйлчилгээний нөхцөлийг бүрэн уншиж танилцсан, ойлгосон, хүлээн зөвшөөрсөнд тооцно.
Хэрэв та энэхүү үйлчилгээний нөхцөлийг хүлээн зөвшөөрөхгүй бол WinU платформыг ашиглахгүй байх үүрэгтэй.

НЭГ. НИЙТЛЭГ ҮНДЭСЛЭЛ

1.1 “WinU” нь мэдээллийн технологид суурилсан цахим платформ бөгөөд хэрэглэгч болон харилцагч байгууллагын хооронд бүтээгдэхүүн, үйлчилгээний захиалга, борлуулалт, төлбөр тооцоо, хүргэлт, урамшуулал болон бусад холбогдох үйлчилгээг цахим хэлбэрээр зохион байгуулах зориулалттай.
1.2 Энэхүү үйлчилгээний нөхцөл нь WinU платформд бүртгүүлэх, платформ ашиглах, бүтээгдэхүүн, үйлчилгээ худалдан авах, борлуулах, төлбөр тооцоо хийх, хүргэлт зохион байгуулах, урамшуулалд хамрагдах, хувийн мэдээлэл боловсруулах болон талуудын эрх, үүрэг, хариуцлагатай холбоотой харилцааг зохицуулна.
1.3 Энэхүү үйлчилгээний нөхцөл нь WinU аппликейшн, цахим хуудас болон бусад төхөөрөмжөөр дамжуулан үзүүлж буй бүх үйлчилгээнд нэгэн адил үйлчилнэ.
1.4 WinU нь хэрэглэгч болон харилцагч байгууллагыг холбох, захиалга, төлбөр тооцооны цахим шийдэл үзүүлэх үүрэгтэй бөгөөд харилцагч байгууллагын байршуулсан бүтээгдэхүүн, үйлчилгээний чанар, баталгаа, хүргэлт, хууль ёсны байдал болон хэрэглэгчтэй үүсэх маргааныг харилцагч байгууллага бие даан хариуцна.
1.5 Үйлчилгээний нөхцөлд хэрэглэсэн нэр томьёог дараах утгаар ойлгоно.
1.5.1 “WinU” гэж бүтээгдэхүүн, бизнес сошиал флатформ, худалдан авалт, төлбөр тооцоо, хүргэлт, урамшуулал болон бусад үйлчилгээг цахим хэлбэрээр зохион байгуулах платформыг ойлгоно.
1.5.2 “Хэрэглэгч” гэж WinU платформд бүртгүүлэн бүтээгдэхүүн, үйлчилгээ авах, захиалга хийх, урамшуулалд хамрагдах болон платформын бусад үйлчилгээг ашиглаж буй хувь хүн, хуулийн этгээдийг ойлгоно.
1.5.3 “Мерчант” гэж WinU платформоор дамжуулан өөрийн бүтээгдэхүүн, үйлчилгээг хэрэглэгчдэд санал болгож, сурталчилж, борлуулж буй хувь хүн, хуулийн этгээдийг ойлгоно.
1.5.4 “Бүтээгдэхүүн, үйлчилгээ” гэж харилцагч байгууллагаас WinU платформоор дамжуулан санал болгож буй бүх төрлийн бараа бүтээгдэхүүн, ажил үйлчилгээ, цахим үйлчилгээ болон бусад борлуулалтын зүйлийг ойлгоно.
1.5.5 “Захиалга” гэж хэрэглэгч WinU платформоор дамжуулан бүтээгдэхүүн, үйлчилгээ худалдан авах хүсэлт гаргаж, төлбөрийн нөхцөл баталгаажуулсан үйлдлийг ойлгоно.
1.5.6 “Төлбөрийн хэрэгсэл” гэж арилжааны банк, цахим хэтэвч, QR төлбөр, карт, хуваан төлөлт, цахим зээл болон бусад цахим төлбөрийн системийг ойлгоно.
1.5.7 “WinU данс” гэж хэрэглэгч болон харилцагч байгууллагын төлбөр тооцоо, орлого, зарлага, шимтгэл, буцаалт болон бусад санхүүгийн мэдээлэл бүртгэгдэх системийн дансны хэсгийг ойлгоно.
1.5.8 “Үйлчилгээний шимтгэл” гэж WinU платформоор дамжуулан амжилттай хийгдсэн борлуулалтын үнийн дүнгээс бизнесээс суутган авах шимтгэлийг ойлгоно.
1.5.9 “Нууцлалын бодлого” гэж хэрэглэгч болон харилцагч байгууллагын хувийн мэдээллийг цуглуулах, боловсруулах, хадгалах, ашиглах, хамгаалахтай холбоотой байгууллагын баримт бичгийг ойлгоно.

ХОЁР. ҮЙЛЧИЛГЭЭНИЙ НӨХЦӨЛИЙГ ХҮЛЭЭН ЗӨВШӨӨРӨХ

2.1 Хэрэглэгч болон харилцагч байгууллага нь WinU платформд бүртгүүлэхээс өмнө энэхүү үйлчилгээний нөхцөл болон нууцлалын бодлоготой бүрэн танилцах үүрэгтэй.
2.2 Хэрэглэгч “Би зөвшөөрч байна”, “Үргэлжлүүлэх”, “Бүртгүүлэх” зэрэг зөвшөөрөл илэрхийлэх товч, сонгох нүд эсхүл түүнтэй адилтгах цахим үйлдэл хийснээр энэхүү үйлчилгээний нөхцөл болон нууцлалын бодлогыг хүлээн зөвшөөрсөнд тооцно.
2.3 Хэрэв хэрэглэгч үйлчилгээний нөхцөл болон нууцлалын бодлогыг хүлээн зөвшөөрөхгүй бол WinU платформыг ашиглахгүй байх эрхтэй.
2.4 WinU нь үйлчилгээний нөхцөлийг хүлээн зөвшөөрөөгүй хэрэглэгчид платформын зарим болон бүх үйлчилгээг ашиглуулахгүй байх эрхтэй.

ГУРАВ. ХЭРЭГЛЭГЧИЙН БҮРТГЭЛ, ШААРДЛАГА

3.1 Хэрэглэгч болон харилцагч байгууллага нь гар утасны дугаар, цахим шуудангийн хаяг болон шаардлагатай бусад мэдээлэлд үндэслэн WinU платформд бүртгэл үүсгэнэ.
3.2 WinU нь хэрэглэгчийн бүртгэлийг баталгаажуулах зорилгоор нэг удаагийн нууц код, баталгаажуулах холбоос, DAN систем, цахим гарын үсэг эсхүл бусад баталгаажуулалтын арга ашиглаж болно.
3.3 Хэрэглэгч өөрийн бүртгэл, нэвтрэх нэр, нууц үг, нэг удаагийн код болон бусад баталгаажуулах мэдээллийн нууцлалыг бүрэн хариуцна.
3.4 Хэрэглэгч өөрийн бүртгэлийг гуравдагч этгээдэд ашиглуулах, бусдад дамжуулах, зөвшөөрөлгүйгээр бусдын бүртгэл ашиглахыг хориглоно. Хэрэглэгч үүнээс үүссэн эрсдлийг өөрөө хариуцна.
3.5 Хэрэглэгч нь WinU платформд оруулсан мэдээллийн үнэн зөв, бүрэн бүтэн, хууль ёсны байдлыг бүрэн хариуцна.
3.6 WinU платформыг ашиглах хэрэглэгч нь иргэний эрх зүйн бүрэн чадамжтай байна. Иргэний эрх зүйн бүрэн чадамжгүй этгээд платформ ашигласнаас үүдэн гарах аливаа үр дагаврыг тухайн этгээд, түүний хууль ёсны төлөөлөгч, асран хамгаалагч эсхүл харгалзан дэмжигч хариуцна.
3.7 Зарим төрлийн бүтээгдэхүүн, үйлчилгээ нь холбогдох хууль тогтоомжийн дагуу насны доод хязгаар, тусгай зөвшөөрөл, баталгаажуулалт шаардаж болно. Ийм тохиолдолд хэрэглэгч тухайн шаардлагыг хангаж буйгаа баталгаажуулах үүрэгтэй.
3.8 Бусдын нэр, хувийн мэдээлэл, төлбөрийн хэрэгсэл, банкны данс ашиглан бүртгэл үүсгэх, захиалга хийх, төлбөр төлөхийг хориглоно.
3.9 WinU нь бүртгэлийн мэдээлэл худал, буруу, дутуу, эсхүл хууль бус шинжтэй гэж үзэх үндэслэлтэй тохиолдолд бүртгэлийг түдгэлзүүлэх, хязгаарлах, устгах эрхтэй.

ДӨРӨВ. ХЭРЭГЛЭГЧИЙН ЗӨВШӨӨРӨЛ БА ХУВИЙН МЭДЭЭЛЭЛ

4.1 Хэрэглэгч нь WinU платформ ашиглах явцад оруулсан өөрийн хувийн мэдээллийг байгууллага цуглуулах, боловсруулах, хадгалах, ашиглахыг зөвшөөрнө.
4.2 Байгууллага нь хэрэглэгчийн зөвшөөрлийн үндсэн дээр хувийн мэдээллийг хүлээн авч, холбогдох хууль тогтоомж болон журамд заасан хугацаанд, тогтоосон шаардлагын дагуу цахим болон цаасан хэлбэрээр хадгална.
4.3 WinU нь хэрэглэгчийг таньж мэдэх, баталгаажуулах зорилгоор овог, нэр, регистрийн дугаар, иргэний бүртгэлийн дугаар, төрсөн огноо, иргэний үнэмлэхийн мэдээлэл, утасны дугаар, цахим шуудангийн хаяг, оршин суугаа хаяг, ажил эрхлэлтийн байдал, орлогын мэдээлэл болон шаардлагатай бусад мэдээллийг шаардах эрхтэй.
4.4 WinU нь хэрэглэгчийн зөвшөөрлийн үндсэн дээр DAN цахим мэдээллийн сантай холбогдож, хэрэглэгчийн хувийн мэдээллийг тулган шалгах, баталгаажуулах эрхтэй.
4.5 Шаардлагатай тохиолдолд хэрэглэгчийн WinU платформд оруулсан, эсвэл таниулах баталгаажуулалт, залилангаас сэргийлэх/аюулгүй байдал, эрсдэлийн үнэлгээ болон тохирох бүтээгдэхүүн, үйлчилгээ санал болгох зорилгоор тодорхой зөвшөөрсөн мэдээллийг боловсруулж болно. WinU нь хэрэглэгчийн төхөөрөмжийн холбоо барих жагсаалт, календарь эсвэл платформоос гадуурх үзсэн/хайсан түүхийг хуулбарлан цуглуулахгүй.
4.6 Хэрэглэгч WinU платформтой хамтран ажиллаж буй бусад байгууллагын бүтээгдэхүүн, үйлчилгээг авах хүсэлт гаргасан тохиолдолд байгууллага нь хэрэглэгчийн зөвшөөрсөн хүрээнд холбогдох мэдээллийг тухайн байгууллагад хуваалцаж болно.
4.7 WinU платформыг сайжруулах, хөгжүүлэх, өргөжүүлэх, техникийн дэмжлэг үзүүлэх зорилгоор хамтран ажиллаж буй гүйцэтгэгч, зөвлөх, үйлчилгээ үзүүлэгчид мэдээллийг шаардлагатай хэмжээнд, нууцлалын үүрэг хүлээлгэн хуваалцаж болно.
4.8 Хуульд заасан үндэслэлээр эрх бүхий байгууллагаас мэдээлэл шаардсан тохиолдолд WinU нь холбогдох мэдээллийг хууль тогтоомжид нийцүүлэн, шаардсан хэмжээгээр хязгаарлан гаргаж өгөх эрхтэй.
4.9 Хэрэглэгчийн биеийн давхцахгүй өгөгдлийг байгууллагын систем, серверт хадгалахгүй.

ТАВ. ХЭРЭГЛЭГЧИЙН ЭРХ, ҮҮРЭГ

5.1 Хэрэглэгч нь WinU платформыг Монгол Улсын хууль тогтоомж, нийтээр хүлээн зөвшөөрсөн ёс зүй болон энэхүү үйлчилгээний нөхцөлд нийцүүлэн ашиглах үүрэгтэй.
5.2 Хэрэглэгч нь бүтээгдэхүүн, үйлчилгээний мэдээлэлтэй сайтар танилцаж, захиалга болон төлбөрөө баталгаажуулахаас өмнө мэдээллийг нягтлах үүрэгтэй.
5.3 Хэрэглэгч нь захиалгын хаяг, холбоо барих мэдээлэл, төлбөрийн мэдээлэл болон бусад шаардлагатай мэдээллийг үнэн зөв оруулах үүрэгтэй.
5.4 Хэрэглэгч дараах үйлдлийг хийхийг хориглоно.
5.4.1 Худал, төөрөгдүүлсэн, хууль бус мэдээлэл байршуулах;
5.4.2 Бусдын оюуны өмч, нэр хүнд, хувийн мэдээлэлд халдах;
5.4.3 Хуурамч захиалга, зохиомол гүйлгээ үүсгэх;
5.4.4 Хориглосон болон хууль бус бүтээгдэхүүн, үйлчилгээ худалдан авах, худалдах, санал болгох;
5.4.5 WinU платформын хэвийн үйл ажиллагаанд саад учруулах;
5.4.6 Бусдын нэр дээрх төлбөрийн хэрэгсэл, банкны данс, карт, цахим хэтэвч болон бусад санхүүгийн мэдээллийг зөвшөөрөлгүй ашиглах;
5.4.7 WinU-ийн нэр хүнд, үйл ажиллагаанд сөргөөр нөлөөлөх, худал мэдээлэл тараах, гутаан доромжлох;
5.4.8 Бусдын нэр, мэдээллийг ашиглан WinU платформд бүртгэл үүсгэх, үйлчилгээ авах;
5.4.9 Кредит эрх, хуваан төлөлт, цахим зээл болон бусад төлбөрийн шийдлийг бэлэн мөнгө гаргах, шилжүүлэх, хуурамч гүйлгээ үүсгэх зорилгоор ашиглах.
5.5 Хэрэглэгч үйлчилгээний нөхцөлийг зөрчсөний улмаас WinU, харилцагч байгууллага, бусад хэрэглэгч болон гуравдагч этгээдэд учруулсан аливаа хохирлыг бүрэн хариуцна.
5.6 Хэрэв аливаа урамшуулал, төлбөр, шимтгэл, хураамж, гүйлгээг алдаатай гэж үзвэл хэрэглэгч тухайн гүйлгээ хийгдсэн өдрөөс хойш 10 /арав/ хоногийн дотор WinU-ийн албан ёсны сувгаар хандаж шалгуулах эрхтэй.
5.7 Хэрэглэгч WinU платформыг аливаа хувь хүнээр зөвшөөрөлгүй төлөөлөн ашиглахыг хориглоно. Ийнхүү ашигласнаас үүдэн гарах үр дагавар, хууль зүйн болон бусад хариуцлагыг хэрэглэгч дангаар хариуцна.
5.8 Хэрэв хэрэглэгч аливаа байгууллагыг төлөөлөн WinU платформыг ашиглаж байгаа бол тухайн байгууллагыг төлөөлөх эрхтэй бөгөөд тухайн байгууллага энэхүү үйлчилгээний нөхцөлийг хүлээн зөвшөөрсөнд тооцно. Төлөөлөн хийсэн аливаа үйлдлийн үр дагавар, үүрэг хариуцлагыг хэрэглэгч болон тухайн байгууллага хамтран хүлээнэ.

ЗУРГАА. МЕРЧАНТ БАЙГУУЛЛАГЫН ЭРХ, ҮҮРЭГ

6.1 Харилцагч байгууллага нь WinU платформоор дамжуулан бүтээгдэхүүн, үйлчилгээгээ нийтлэх, сурталчлах, борлуулах эрхтэй.
6.2 Харилцагч байгууллага нь платформд байршуулсан бүтээгдэхүүн, үйлчилгээний мэдээлэл, үнэ, тайлбар, зураг, үлдэгдэл, чанар, баталгаа, гарал үүсэл, хууль ёсны байдал болон хэрэглэгчид өгөх бусад мэдээллийн үнэн зөв, бүрэн байдлыг дангаар хариуцна.
6.3 Харилцагч байгууллага нь WinU платформоор дамжуулан хийгдсэн борлуулалтын нийт үнийн дүнгээс үйлчилгээний шимтгэлд 5 /таван/ хувийн хураамж төлнө. Энэхүү шимтгэлийг WinU нь борлуулалтын төлбөрөөс суутган авах эрхтэй.
6.4 Харилцагч байгууллага нь бүтээгдэхүүн, үйлчилгээг байгууллагын хамтран ажиллагч хүргэлтийн үйлчилгээгээр эсхүл өөрийн хүргэлтийн системээр дамжуулан хүргэх эрхтэй.
6.5 Бүтээгдэхүүн, үйлчилгээний хүргэлт, чанар, баталгаа, буцаалт, солилт болон хэрэглэгчтэй холбоотой аливаа гомдол, маргааныг харилцагч байгууллага бие даан хариуцан шийдвэрлэнэ.
6.6 Харилцагч байгууллага нь хууль тогтоомжид хориглосон, зохих зөвшөөрөлгүй, хэрэглэгчийн амь нас, эрүүл мэнд, эд хөрөнгөд хохирол учруулж болзошгүй бүтээгдэхүүн, үйлчилгээ байршуулахыг хориглоно.
6.7 Харилцагч байгууллага нь бүтээгдэхүүн, үйлчилгээний үнийг бодит, ил тод, хэрэглэгчийг төөрөгдүүлэхгүй байдлаар нийтлэх үүрэгтэй.
6.8 Харилцагч байгууллага нь төлбөрийн хэлбэрээс хамааран хэрэглэгчийг ялгаварлах, нэмэлт төлбөр үндэслэлгүй шаардах, бараа бүтээгдэхүүний үнийг зохиомлоор нэмэгдүүлэхийг хориглоно.
6.9 Харилцагч байгууллага нь WinU-ийн нэр хүнд, хэвийн үйл ажиллагаанд сөргөөр нөлөөлөх аливаа үйл ажиллагаа явуулахгүй.
6.10 Харилцагч байгууллага нь захиалгын и-баримт, НӨАТ, татвар болон холбогдох хууль тогтоомжийн дагуу хүлээх үүргээ бие даан хэрэгжүүлнэ.

ДОЛОО. БҮТЭЭГДЭХҮҮН, ҮЙЛЧИЛГЭЭНИЙ МЭДЭЭЛЭЛ НИЙТЛЭХ

7.1 Харилцагч байгууллага нь бүтээгдэхүүн, үйлчилгээний нэр, үнэ, зураг, тайлбар, зориулалт, хэрэглээ, хадгалалт, баталгаат хугацаа, хүргэлтийн нөхцөл, үлдэгдэл болон бусад шаардлагатай мэдээллийг үнэн зөв, бүрэн нийтлэх үүрэгтэй.
7.2 Харилцагч байгууллага нь бусдын оюуны өмч, барааны тэмдэг, зураг, видео, контент, нэр, лого болон бусад мэдээллийг зөвшөөрөлгүй ашиглахыг хориглоно.
7.3 Харилцагч байгууллага нь бүтээгдэхүүн, үйлчилгээ борлуулсны дараа хэрэглэгчид ашиггүй, анхны нөхцөлийг дордуулсан байдлаар тайлбар, үнэ, нөхцөлийг өөрчлөхийг хориглоно.
7.4 WinU нь үйлчилгээний нөхцөл зөрчсөн, хууль бус, төөрөгдүүлсэн, гомдол гарсан эсхүл эрсдэлтэй гэж үзсэн бүтээгдэхүүн, үйлчилгээний мэдээллийг түр нуух, засварлуулах, нийтлэхээс татгалзах эрхтэй.
7.5 Харилцагч байгууллага нь бүтээгдэхүүн, үйлчилгээний үлдэгдлийн мэдээллийг тухай бүр шинэчлэх үүрэгтэй. Үүнийг биелүүлээгүйгээс үүдэх аливаа хохирол, гомдол, маргааныг мерчант байгууллага хариуцна.

НАЙМ. ЗАХИАЛГА ХИЙХ, БАТАЛГААЖИХ

8.1 Хэрэглэгч WinU платформоор дамжуулан 24 цагийн аль ч үед бүтээгдэхүүн, үйлчилгээний захиалга үүсгэх боломжтой.
8.2 Хэрэглэгч захиалга хийхээс өмнө бүтээгдэхүүн, үйлчилгээний мэдээлэл, үнэ, хүргэлтийн нөхцөл, буцаалт, солилтын нөхцөл болон бусад холбогдох мэдээлэлтэй сайтар танилцах үүрэгтэй.
8.3 Хэрэглэгч захиалгын төлбөрийг WinU платформд байршуулсан төлбөрийн хэрэгслээр төлснөөр захиалга баталгаажна.
8.4 Төлбөр бүрэн баталгаажаагүй захиалгыг WinU хүчин төгөлдөр захиалга гэж үзэхгүй.
8.5 Захиалга баталгаажсаны дараа хэрэглэгч болон харилцагч байгууллагын хооронд тухайн бүтээгдэхүүн, үйлчилгээтэй холбоотой худалдах, худалдан авах харилцаа үүссэнд тооцно.
8.6 Захиалгын мэдээлэл, төлбөрийн төлөв, хүргэлтийн төлөв болон бусад мэдэгдлийг WinU нь хэрэглэгчийн бүртгэлтэй утас, цахим шуудан, апп мэдэгдэл болон бусад сувгаар илгээж болно.

ЕС. ТӨЛБӨР ТООЦООНЫ НӨХЦӨЛ

9.1 Хэрэглэгч бүтээгдэхүүн, үйлчилгээний төлбөрийг WinU платформд байршуулсан төлбөрийн хэрэгслээр дамжуулан гүйцэтгэнэ.
9.2 WinU нь баталгаажсан захиалгын төлбөрөөс үйлчилгээний шимтгэл, банкны гүйлгээний шимтгэл болон холбогдох бусад суутгалыг суутган, үлдэх төлбөрийг харилцагч байгууллагын WinU дансанд шилжүүлнэ.
9.3 Харилцагч байгууллага нь “Косо Лайн” ХХК хаан банк дансанд хуримтлагдсан төлбөрийг өөрийн баталгаажсан банкны данс руу шилжүүлэн авах хүсэлт гаргах эрхтэй.
9.4 Техникийн саатал, банкны алдаа, давхар гүйлгээ, үндэслэлгүй төлбөр болон бусад ижил төстэй нөхцөлөөс шалтгаалан алдаатай гүйлгээ үүссэн тохиолдолд WinU тухайн гүйлгээг залруулах, буцаах, суутгах эрхтэй.
9.5 Алдаатай гүйлгээг мэдсээр байж нуух, завших, буцаан олгохоос татгалзах, хууль бус ашиг олохыг хориглоно.
9.6 Хэрэв харилцагч байгууллагын “Косо Лайн” ХХК дансанд алдаатай, давхардсан эсхүл үндэслэлгүй гүйлгээ орсон бол харилцагч байгууллага тухайн нөхцөл байдлыг мэдсэн даруй WinU-д мэдэгдэж, гүйлгээг залруулахад хамтран ажиллах үүрэгтэй.
9.7 Хуваан төлөлт, цахим зээл болон гуравдагч этгээдийн төлбөрийн шийдлийг ашигласан тохиолдолд тухайн төлбөрийн үйлчилгээ үзүүлэгчийн нөхцөл давхар үйлчилнэ.

АРАВ. ХҮРГЭЛТИЙН НӨХЦӨЛ

10.1 Харилцагч байгууллага нь бүтээгдэхүүн, үйлчилгээний хүргэлтийг өөрөө эсхүл WinU-ийн хамтран ажиллагч хүргэлтийн байгууллагаар дамжуулан зохион байгуулна.
10.2 Хүргэлтийн хугацаа, төлбөр, байршил, нэмэлт нөхцөл нь тухайн бүтээгдэхүүн, үйлчилгээний шинж чанар болон хүргэлтийн хэлбэрээс хамаарч өөр байж болно.
10.3 Хэрэглэгч захиалга хийхдээ хүргэлтийн хаяг, холбоо барих утас, хүлээн авах хүний мэдээллийг үнэн зөв, бүрэн оруулах үүрэгтэй.
10.4 Хэрэглэгчийн буруу, дутуу мэдээллээс шалтгаалан хүргэлт саатсан, буруу хүргэгдсэн, алдагдсан, нэмэлт зардал үүссэн тохиолдолд холбогдох эрсдэл, зардлыг хэрэглэгч хариуцна.
10.5 Хэрэглэгч бүтээгдэхүүн, үйлчилгээг хүлээн авахдаа бүрэн бүтэн байдал, тоо хэмжээ, загвар, өнгө, хэмжээ, ажиллагаа болон бусад шаардлагатай нөхцөлийг шалгах үүрэгтэй.
10.6 Хэрэглэгч бүтээгдэхүүн, үйлчилгээг хүлээн авснаар захиалга биелэгдсэнд тооцно.
10.7 Хэрэглэгчийн захиалга баталгаажсанаас хойш 24–48 цагийн дотор Монгол шуудангаар дамжуулан хүргэгдэнэ.
10.8 Гэнэтийн болон давагдашгүй хүчин зүйл, бүх нийтийн амралтын өдөр, хил гаалийн саатал, цаг агаарын нөхцөл, хорио цээр, гамшгийн нөхцөл, техникийн саатал болон бусад талуудын хяналтаас гадуурх шалтгаанаар хүргэлт саатаж болно.
10.9 Хүргэлттэй холбоотой эрсдэл, саатал, гэмтэл болон бусад асуудлыг хүргэлтийн хэлбэрээс хамааран харилцагч байгууллага эсхүл тухайн хүргэлтийн үйлчилгээ үзүүлэгч хариуцна.

АРВАН НЭГ. ЗАХИАЛГА ЦУЦЛАХ, БУЦААХ, СОЛИХ

11.1 Хэрэглэгч захиалга баталгаажуулахаас өмнө захиалгаа цуцлах эрхтэй.
11.2 Захиалга баталгаажиж, төлбөр төлөгдсөний дараа тухайн бүтээгдэхүүн, үйлчилгээний онцлог болон харилцагч байгууллагын баталсан буцаалт, солилтын нөхцөлд нийцсэн тохиолдолд буцаалт, солилт хийх боломжтой.
11.3 Дараах нөхцөлд хэрэглэгч буцаалт, цуцлалт, солилтын хүсэлт гаргаж болно.
11.3.1 Захиалсан бүтээгдэхүүн, үйлчилгээ нь платформд байршуулсан мэдээллээс зөрүүтэй байсан;
11.3.2 Бүтээгдэхүүн гэмтэлтэй, доголдолтой, ашиглах боломжгүй байсан;
11.4 Хэрэглэгч бүтээгдэхүүн хүлээн авах үед илэрхий харагдах гэмтэл, доголдол, зөрүүг тухайн үед нь шалгаж, баримтжуулах үүрэгтэй.
11.5 Буцаалт, солилт хийх бүтээгдэхүүн нь ашиглагдаагүй, бохирдоогүй, гэмтээгүй, сав баглаа боодол болон дагалдах хэрэгсэл бүрэн, дахин худалдаалах боломжтой байх шаардлагатай.
11.6 Эрүүл ахуй, аюулгүй байдал, хууль тогтоомж, бүтээгдэхүүний шинж чанараас шалтгаалан зарим бүтээгдэхүүн, үйлчилгээнд буцаалт, солилт хийх боломжгүй байж болно.
11.7 Цахим тасалбар, купон, нэг удаагийн эрх, дижитал бүтээгдэхүүн, хугацаатай үйлчилгээ, тусгай захиалгаар бэлтгэсэн бүтээгдэхүүн болон хэрэглэгчийн хүсэлтээр өөрчлөн хийсэн бүтээгдэхүүнд буцаалт хийхгүй байж болно.
11.8 Буцаалт, солилт, цуцлалттай холбоотой хүргэлтийн төлбөр, банкны шимтгэл, төлбөрийн үйлчилгээний шимтгэл болон бусад зардлыг тухайн нөхцөлөөс хамааран хэрэглэгч эсхүл харилцагч байгууллага хариуцна.
11.9 Буцаалт болон цуцлалттай холбоотой асуудлыг харилцагч байгууллага болон хэрэглэгч харилцан тохиролцож шийдвэрлэх бөгөөд WinU нь шаардлагатай тохиолдолд мэдээлэл дамжуулах, техникийн дэмжлэг үзүүлэх үүрэгтэй.
11.10 Харилцагч байгууллагын буруутай үйлдэл, мэдээллийн зөрүү, чанарын доголдлоос үүдэн буцаалт, солилт, цуцлалт үүссэн тохиолдолд холбогдох хохирол, зардлыг харилцагч байгууллага хариуцна.

АРВАН ХОЁР. УРАМШУУЛАЛ, ХӨНГӨЛӨЛТ, КУПОН

12.1 WinU нь хэрэглэгчдэд зориулсан урамшуулал, хөнгөлөлт, купон, оноо, бэлгийн карт болон бусад идэвхжүүлэлтийн үйлчилгээг санал болгож болно.
12.2 Урамшуулал, хөнгөлөлт, купон, оноо, бэлгийн картын хүчинтэй хугацаа, ашиглах нөхцөл, хязгаарлалт, буцаалт болон бусад нөхцөлийг WinU тухай бүр тогтоож, хэрэглэгчид мэдэгдэнэ.
12.3 Урамшуулал, хөнгөлөлт, купон, оноо, бэлгийн картыг хууль бус, залилах, зохиомол гүйлгээ үүсгэх, бусдад дамжуулан ашиглахыг хориглоно.

АРВАН ГУРАВ. ТӨЛБӨРТЭЙ ҮЙЛЧИЛГЭЭ, СУРТАЛЧИЛГАА

13.1 WinU нь харилцагч байгууллагад бүтээгдэхүүн, үйлчилгээ онцлох, сурталчилгаа байршуулах, маркетинг идэвхжүүлэлт хийх болон бусад төлбөртэй үйлчилгээ санал болгож болно.
13.2 Төлбөртэй үйлчилгээний үнэ, хугацаа, байршил, хамрах хүрээ болон бусад нөхцөлийг WinU тухай бүр тогтооно.
13.3 Харилцагч байгууллага төлбөртэй үйлчилгээ авахдаа тухайн үйлчилгээний нөхцөлтэй танилцаж, төлбөрөө баталгаажуулснаар үйлчилгээ идэвхжинэ.
13.4 WinU платформ дээр гуравдагч этгээдийн зар сурталчилгаа, бүтээгдэхүүн, үйлчилгээний мэдээлэл байрлаж болох бөгөөд энэ нь WinU тухайн бүтээгдэхүүн, үйлчилгээг баталгаажуулсан, зөвлөсөн, давуу байдал олгосонд тооцогдохгүй.
13.5 Гуравдагч этгээдийн бүтээгдэхүүн, үйлчилгээ, зар сурталчилгаа, холбоос болон тэдгээртэй холбоотой аливаа хохирол, маргааныг WinU хариуцахгүй.

АРВАН ДӨРӨВ. НУУЦЛАЛ БА МЭДЭЭЛЛИЙН АЮУЛГҮЙ БАЙДАЛ

14.1 WinU нь хэрэглэгчийн хувийн болон санхүүгийн мэдээллийн нууцлалыг хадгалж, энэхүү үйлчилгээний нөхцөл, нууцлалын бодлого болон хуульд зааснаас бусад тохиолдолд гуравдагч этгээдэд дамжуулахгүй.
14.2 WinU нь мэдээллийн аюулгүй байдлыг хангах зорилгоор шаардлагатай техник, программ хангамж, зохион байгуулалтын хамгаалалтын арга хэмжээг хэрэгжүүлнэ.
14.3 WinU нь хэрэглэгчийн мэдээллийг хуульд заасан үндэслэл, эрх бүхий байгууллагын шаардлага, хэрэглэгчийн зөвшөөрөл, үйлчилгээ үзүүлэх шаардлагын хүрээнд ашиглаж болно.
14.4 Хэрэглэгч өөрийн бүртгэл, нууц үг, баталгаажуулах код, төлбөрийн мэдээллийг хамгаалах үүрэгтэй.
14.5 Хэрэглэгчийн буруутай үйлдэл, хайхрамжгүй байдал, мэдээллээ бусдад дамжуулснаас үүдсэн хохирлыг WinU хариуцахгүй.

АРВАН ТАВ. ОЮУНЫ ӨМЧ

15.1 WinU-ийн нэр, лого, барааны тэмдэг, дизайн, бүтэц, программ хангамж, мэдээллийн сан, зураг, видео, текст, контент нь “Косо Лайн” ХХК-ийн байгууллагын өмч болно.
15.2 WinU-ийн оюуны өмчийг байгууллагын бичгээр өгсөн зөвшөөрөлгүйгээр хуулбарлах, олшруулах, өөрчлөх, түгээх, дуурайх, ашиг олох зорилгоор ашиглахыг хориглоно.
15.3 Харилцагч байгууллага нь өөрийн байршуулсан зураг, видео, текст, лого болон бусад контентын оюуны өмчийн эрхийг хууль ёсны дагуу эзэмшиж, ашиглах эрхтэй байх үүрэгтэй.
15.4 Оюуны өмчийн эрх зөрчигдсөн тохиолдолд буруутай этгээд холбогдох хууль тогтоомжид заасан хариуцлага хүлээнэ.

АРВАН ЗУРГАА. ГОМДОЛ, МАРГААН ШИЙДВЭРЛЭХ

16.1 Хэрэглэгч болон мерчант нь WinU платформ, захиалга, төлбөр, хүргэлт, буцаалт, бүтээгдэхүүн, үйлчилгээтэй холбоотой санал хүсэлт, гомдлыг WinU-ийн албан ёсны сувгаар гаргах эрхтэй.
16.2 Гомдол гаргагч нь гомдолтой холбоотой захиалгын дугаар, төлбөрийн баримт, зураг, бичлэг, тайлбар болон бусад нотлох баримтыг хавсаргах үүрэгтэй.
16.3 WinU нь гомдлыг хүлээн авч, холбогдох талуудаас тайлбар, баримт шаардах, мэдээлэл нягтлах, техникийн болон зохион байгуулалтын дэмжлэг үзүүлэх эрхтэй.
16.4 Бүтээгдэхүүн, үйлчилгээний чанар, баталгаа, хүргэлт, буцаалт, солилт болон хэрэглэгчтэй үүссэн маргааныг харилцагч байгууллага үндсэн хариуцагчаар шийдвэрлэнэ.
16.5 Талууд маргааныг харилцан зөвшилцөх замаар шийдвэрлэхийг эрмэлзэнэ. Зөвшилцлөөр шийдвэрлэх боломжгүй тохиолдолд Монгол Улсын холбогдох хууль тогтоомжийн дагуу эрх бүхий байгууллага, шүүхээр шийдвэрлүүлнэ.

АРВАН ДОЛОО. ЗӨРЧИЛ ШАЛГАХ, АРГА ХЭМЖЭЭ АВАХ

17.1 WinU нь хэрэглэгч болон мерчант нь үйлчилгээний нөхцөл зөрчсөн байж болзошгүй үйлдлийг дараах үндэслэлээр шалгах эрхтэй.
17.1.1 WinU-ийн дотоод хяналт, эрсдэлийн үнэлгээ;
17.1.2 Хэрэглэгч, харилцагч байгууллага эсхүл гуравдагч этгээдийн гомдол, санал, хүсэлт;
17.1.3 Банк, санхүүгийн байгууллага, төлбөрийн үйлчилгээ үзүүлэгчээс ирүүлсэн мэдэгдэл;
17.1.4 Хууль сахиулах болон эрх бүхий байгууллагын шаардлага, шийдвэр, мэдэгдэл, албан хүсэлт.
17.2 Зөрчил шалгах хугацаанд WinU нь хэрэглэгч болон харилцагч байгууллагын бүртгэл, захиалга, төлбөр, WinU дансны зарцуулалт, орлого авах эрхийг түр түдгэлзүүлэх эрхтэй.
17.3 Үйлчилгээний нөхцөл зөрчсөн нь тогтоогдсон тохиолдолд WinU дараах арга хэмжээг дангаар эсхүл хамтатган авах эрхтэй.
17.3.1 Бүртгэлийг анхааруулах, түр түдгэлзүүлэх, хязгаарлах эсхүл бүр мөсөн хаах;
17.3.2 Бүтээгдэхүүн, үйлчилгээний мэдээллийг нуух, засварлуулах, устгах;
17.3.3 Захиалга, гүйлгээ болон үйлчилгээний эрхийг хязгаарлах;
17.3.4 WinU дансанд хуримтлагдсан төлбөрийг түр саатуулах, алдаатай болон үндэслэлгүй гүйлгээг суутгах;
17.3.5 Учирсан хохирол, зардлыг нөхөн төлүүлэх;
17.3.6 Холбогдох мэдээллийг хууль хяналтын байгууллагад шилжүүлэн шалгуулах;
17.3.7 Гуравдагч этгээдийн үйлчилгээ үзүүлэгч, банк, санхүүгийн байгууллагад холбогдох мэдээллийг мэдэгдэх.
17.4 Үйлчилгээний нөхцөл зөрчсөнөөс үүдэн бүртгэл нь хаагдсан, үйлчилгээ авах эрх нь хязгаарлагдсан хэрэглэгч эсхүл харилцагч байгууллага дахин бүртгэл үүсгэх, өөр нэрээр үйлчилгээ авахыг хориглоно.

АРВАН НАЙМ. ХАРИУЦЛАГА

18.1 Хэрэглэгч болон харилцагч байгууллага нь үйлчилгээний нөхцөл зөрчсөний улмаас WinU, бусад хэрэглэгч, харилцагч байгууллага болон гуравдагч этгээдэд учруулсан аливаа хохирлыг бүрэн хариуцна.
18.2 Харилцагч байгууллагын байршуулсан бүтээгдэхүүн, үйлчилгээ хүний амь нас, эрүүл мэнд, эд хөрөнгөд хохирол учруулсан тохиолдолд холбогдох хариуцлагыг харилцагч байгууллага дангаар хариуцна.
18.3 Хэрэглэгч болон харилцагч байгууллагын хууль бус, буруутай үйлдлийн улмаас WinU-д төрийн эрх бүхий байгууллага, гэрээт байгууллага, гуравдагч этгээдээс хариуцлага хүлээлгэх, гэрээ цуцлах, торгууль ногдуулах, нэмэлт зардал гарах зэрэг үр дагавар үүссэн бол холбогдох хохирол, зардлыг буруутай этгээд нөхөн төлнө.
18.4 WinU нь харилцагч байгууллагын бүтээгдэхүүн, үйлчилгээний чанар, баталгаа, нийлүүлэлт, хүргэлт, хууль ёсны байдал, хэрэглэгчид өгсөн мэдээллийн үнэн зөв байдлыг бүрэн баталгаажуулах үүрэг хүлээхгүй.
18.5 WinU нь хэрэглэгчийн буруу мэдээлэл оруулсан, төлбөрийн мэдээллээ алдаатай ашигласан, нууц үг, баталгаажуулах кодоо бусдад дамжуулсан, бүтээгдэхүүн үйлчилгээний мэдээлэлтэй бүрэн танилцаагүйгээс үүдэх хохирлыг хариуцахгүй.

АРВАН ЕС. ГЭНЭТИЙН БОЛОН ДАВАГДАШГҮЙ ХҮЧИН ЗҮЙЛ

19.1 Гэнэтийн болон давагдашгүй хүчин зүйлд дайн, зэвсэгт мөргөлдөөн, бослого, байгалийн гамшиг, гал түймэр, үер, газар хөдлөлт, хорио цээр, цар тахал, төрийн эрх бүхий байгууллагын шийдвэр, хил гаалийн саатал, тээвэрлэлтийн саатал, цахилгаан, сүлжээ, программ хангамж, техник тоног төхөөрөмжийн гэмтэл, кибер халдлага болон талуудын хяналтаас гадуурх бусад нөхцөл хамаарна.
19.2 Гэнэтийн болон давагдашгүй хүчин зүйл үүссэн тохиолдолд үүрэг гүйцэтгэх хугацаа тухайн нөхцөл байдал үргэлжлэх хугацаагаар хойшлогдоно.

ХОРЬ. БУСАД НӨХЦӨЛ

20.1 WinU нь үйлчилгээний нөхцөлд нэмэлт, өөрчлөлт оруулах эрхтэй бөгөөд шинэчилсэн нөхцөлийг аппликейшн, цахим хуудас болон бусад албан ёсны сувгаар дамжуулан хэрэглэгч болон байгууллагад мэдэгдэнэ.
20.2 Шинэ бүтээгдэхүүн, үйлчилгээ нэвтрүүлэхтэй холбоотой нэмэлт нөхцөл нь энэхүү үйлчилгээний нөхцөлийн салшгүй хэсэг болно.
20.3 Хэрэглэгч болон харилцагч байгууллага нь үйлчилгээний нөхцөл болон түүний нэмэлт, өөрчлөлттэй тухай бүр танилцаж мөрдөх үүрэгтэй.
20.4 Үйлчилгээний нөхцөлийг танилцаагүй, ойлгоогүйгээс үүдэн гарах үр дагаврыг хэрэглэгч болон харилцагч байгууллага өөрөө хариуцна.
20.5 Энэхүү үйлчилгээний нөхцөлтэй холбоотой харилцааг Монгол Улсын хууль тогтоомжийн дагуу зохицуулна.